L cunsëi dla Park Urtijëi GmbH se à ancuntà ultimamënter per fé na analisa de coche la ie jita per chël che reverda la trëi strutures che vën aministredes da chësta sozietà.
La Park Urtijëi GmbH aministrea la Gara- ge Central a Urtijëi, l Zënter dal tennis a Runcadic y la Plaza dai auti Setil. I amini- stradëures Konrad Senoner, Claudia Insam y Ewald Moroder à pudù ti prejenté al Chemun, che ie l sëul cumëmber dla so- zietà, n resultat positif.
Cie che l ie unì fat per miuré la Garage Central
Ti trëi ani de aministrazion passei se à l cunsëi nuef cruzià de miuré la strutures, fajan lëures che à purtà a n bel cialé ora dla Garage Central. La garage ie śën drët linëusa y curespuend ala normatives de segurëza scrites dant.
Nce per chël che à da nfé cun la tecnolo- gies nueves iel unì fat de plu nvestimënc. Nscila an śën la puscibltà de furné ite, prejentan pra la stangia la cherta de credit, bancomat o l fonin y n possa pona furné ora fajan l medemo, zënza messëi jì pra la cassa a fé l paiamënt. N problem che n cialerà de ressolver al plu prësc sarà chël de spusté la stangia dla ntreda plu insù per pudëi fé a na maniera che chëi che à n abunamënt possa furné ite te garage nce sce l ie plu auti che aspieta per pudëi furné ite.
Per duc i zitadins lecurdons mo n iede che n possa se damandé la "Happy Hour Card". Chësta cherta giapen, paian na cauzion de 10 € y n possa la ciarië su cun la soma che n uel. Parchejan cun chësta cherta ie la prima ëura y mesa debant. Uni ëura sëu- raprò costa 1,80 €.
Zënter dal tennis: l proiet de mascima per n tët nuef ie unì dat pro
Per chël che reverda l Zënter dal tennis a Runcadic iel unì dat pro dal cunsëi dla Park Urtijëi l proiet de mascima laurà ora dal architet Hannes Mahlknecht per renuvé l tët dl fabricat y per adaté dut l fabricat, che ie uni fat su dan 36 ani, ala normatives atueles per la prevenzion dl meldefuech y per adaté l mplant eletrich ai bujëns de al didancuei. Dut chësc ie de bujën per avëi inant l bënsté dl Chemun de Ciastel y pudëi mëter a jì turnoies de tennis, ativiteies cultureles y mostres de artejanat coche l’UNIKA. I lëures, che do l'ultima stima unirà a custé plu o manco 900.000€, unirà n gran pert finanziei dal Chemun, n pert dala Park Urtijëi y n cialerà nce, sce l sarà mesun, de giapé n cuntribut dala Provinzia.
N possa inò jì cun i jadins via n Setil.
Sun la plaza dai auti Setil uniral nce chëst ann, coche uni ann d’inviern, pità la pusci- bltà de jì cun i jadins. Na smueia che fova unida ju d’autonn à revinà la roles, che n ova bele metù ora per fé la dlacia. Giut alalongia ne foven perchël nia segures sce n ëssa mo pudù fé la plaza da jadiné o no. Per fertuna iesen ala fin dla finedes stac boni de rumé su la roles che fova rotes y mëter via chëles che ie mo da pudëi avëi, y fé nsci na dlacia naturela per jì cun i jadins. Per gauja dla smueia an messù renunzië ala roles che n tulova ca i autri ani per sferdé la dlacia, perchël muessa nce l tëmp n pue’ judé pea acioche dut garate. L ie da dì che per l daunì iesen tl lëur de cialé do coche n pudëssa miuré la situazion, a na maniera che la plaza da jadiné posse unì fata uni ann cun plu segurëza y unì nuzeda plu giut y miec.
L Hockey Club Gherdëina se cruzia dla gestion dla plaza da jadiné via Setil, sun si plata facebook y sun chëla dla Jonta de Urtijëi abinen i orars de giaurida.
Ann positif per la Park Urtijëi
Ora dl fat dla smueia via n Setil iel stat per la plaza da parchejé n ann positif. N cun- front al ann dant iel unì parchejà l 12% de auti mplu tla Garage Central y l 5% mplu tla plaza dai auti via n Setil. Dut adum rejonen de 81.000 auti y 1.200 curieres. La ntredes dla Park Urtijëi ie nce jites su dl 12% y sarà ala fin dl ann ntëur ai 360.000 euro.