Ideies y vijions cuncretes de jënt che à ueia de lauré per l luech

Una dla majera ndesfidedes sarà ti proscimi ani chëla de lauré ora l plann urbanistich nuef, aldò dla regules ududes dant dala lege urbanistica da permò jita n droa. Ulon lauré ora, cun la pertezipazion dla jënt, n “plan de svilup strategich” da fundamënt che posse garantì n svilup sane dl luech, ti dajan da sté ai jëuni y stravardan l plu che la va l vërt.

Ulon danter l auter purté inant l proiet bele nvià via de tò n tòch dl bosch do la streda Sobosch ora per l frabiché alesirà, per pudëi nsci realisé ti proscimi ani ades 30 cuatieres per jënt da tlo.

Ti ultim ani ons abadà che l vën adalerch for plu y plu auti, mpifan su dut l luech. La problematica dl trafich muessen ressolver te n cunzet generel a livel de valeda, se nuzan dl aiut de esperc tl ciamp dla mobilità.

De gran mpurtanza iel ti dé la priorità a chiche va a pe y cun la roda. I troies tl luech dëssa unì valorisei y nce per la rodes iel da abiné troies segures tl luech. L proiet “Rodaval”, che ie fërm per gauja de n stritoz dan suneria, resta na priorità.

Ulon jì inant cun l proiet de mascima per na zircunvalazion nueva de Urtijëi, cunscideran nce la cunseguënzes che na tel streda cumpurtëssa per l trafich a livel de valeda.

Nëus crion te na plaza Sant Antone zënza auti y ulon jì inant cun l Plan de recuper “Ladinia” laurà ora ti ultimi ani. Na plaza per la persones mpede per i auti y n raion da jì a pe slungià dajerà na gran cualità de vita al zënter, coche l ie stat cun nosc raion da jì a pe.

N auter proiet che ulon tré tres ie l cunliamënt danter la streda Rezia y la Tresval dal Fever. Ulon auté ju tla Tresval l trafich che vën dala scoles ju bele dal Fever a na maniera da pudëi chité ju la streda Rezia ulache truepa bars y butëighes à si atività. Manco auti y plu persones che va a pe!

Cun i proiec “Ladinia” y “Fever” taca adum l daunì de nosta truepa butëighes, dla ustaries y di restauranc tl zënter. Per la cualità de vita de nëus zitadins ie chësta ativiteies nce ora dl zënter de gran mpurtanza. Ulon perchël sensibilisé i zitadins a cumpré ite dantaldut tl luech y manco oradecà y tres internet, per sustenì nsci nosta mprejes che dà cualità de vita y vivanda a Urtijëi.

Tan mpurtant che ie l turism te nosta valeda ons udù ntan i mënsc passei. Sce l vën a mancë patësc nce truepa ativiteies che taca leprò. Ma iust sën an nce udù tan sussot che son perdrët ruvëi tla sajons autes, cun la cunseguënza che l pudëssa unì a mancë la azetanza da pert de nosta jënt. N turism, per vester de cualità, muessa dantaldut respeté i bujëns y l bënsté di zitadins dl luech.

L’esperienza dl coronavirus dëssa nes purté a na forma nueva de turism. Mé stravardan vëiramënter l ambient y nosta arpejon culturela puderons pité n turism de cualità.

Nosc bënsté, nia mé economich, se stiza sun la marueies de nosc raion. L recunescimënt UNESCO à purtà cunseguenzes nia mé positives a nosc luesc. Messon se rënder cont che chësc titul cumporta dantaldut la respunsabltà de n svilup sustenibl y de scunanza de nosc raions.

Messon damprovia cialé de miuré l’efizienza energetica dla cëses de chemun. Ulon perchël danter l auter purté a piz l proiet bele nvià via de ressanamënt energetich dl Sprengl Saniter y purté damprovia duta la luminaria publica a avëi la tecnologia LED.

L argumënt de majera mpurtanza ie la funtanes de Cunfin y l cunliamënt Monte Pana - Saltria. Per defënder l’ega de ca. 6.000 zitadins y de duc i turisc’ fajerons dut l puscibl. La Lista Unica, cun duc si 10 cunselieres, à bele te doi deliberes de Cunsëi tëut tlermenter posizion contro l cunliamënt. Nsci sarala nce tl daunì.

L lëur da paur ie da sustenì de uni viers. La cura di prei y di bòsc ie de gran valuta per l cialé ora de nosta cuntreda. Cialeron che nosc raion posse unì curà inant n armunia cun i bujëns dla persona. Ulessan purvé a crì mo deplù sinergies danter i paures y l turism.

L sarà nce mpurtant sensibilisé i patrons di vedli mejes a i mantenì l plu che la va, abinan l balanz danter i bujëns dla persones che sta laite y la scunanza dla bela arpejon architetonica de nosta valeda.

L internet tres fibra otica ie deventà al didancuei la basa dl’efizienza tl lëur. Do che l ie unì scumencià cun i lëures per l prim lot ti ultimi mënsc ulons deberieda cun la sozietà publica Infranet ti sté do l plu che la va, acioche l vënie nce a se l dé al plu prësc l segondo lot per pité l servisc a duta la cëses de Urtijëi.

Urtijëi ie storicamënter l zënter culturel dla valeda y l Chemun à da for sustenì duta la formes de cultura y de ert. Nosc mpëni ie de stravardé y valorisé particularmënter la cultura ladina, tl respet de duta la trëi rujenedes dla valeda.

L gran proiet de na Cësa di Ladins nueva – puscion dla Union di Ladins de Gherdëina y sënta dl Museum Gherdëina, dla Lia dl teater y dla Union Generela di Ladins dla Dolomites – ie per nëus na priorità: la dëssa deventé n zënter culturel per duta la jënt de Gherdëina y per i patins. N ie stac boni te chisc ani de abiné n consens danter duta la lies che à si sënta tla Cësa di Ladins per abiné na soluzion a duc i bujëns y se nuzé dla sinergies. L cuncors de proietazion, bele nvià via, se stlujerà ju mo dan la fin dl ann. Ntant cialerons de giapé na resposta positiva dala Provinzia, dala Region y dai autri Chemuns de Gherdëina n cont dl finanziamënt.

L artejanat ie na seva mpurtanta de nosta economia ma nce de nosta sozietà. L sarà nosc mpëni ti jì ncontra ai artejans, dajan su lëures a firmes da tlo canche la normativa sun i lëurs publics l lascia pro.

Cun l raion artejanel Socrëp ons la puscibltà de ti judé ai artejans jëuni de ruvé pra na berstot y nce pra n cuatier. Ulon n var al iede rënder plu atratif l raion, realisan nce na ntreda nueva dala streda Sciron ite aldò de na pruposta che on lascià lauré ora.

Grant ie l valor culturel y soziel dl artejanat artistich te nosc luech. Deberieda cun la lia La Vëta y n culaburazion cun la lia Artejanat Artistich an scumencià a crì stredes nueves, acioche i jëuni peie inò ite te chësc bel ert.

Ti ultimi mënsc ons cun duta la categories che lëura tl ciamp dl artejanat artistich nvià via n proiet che à sciche fin chël de fé cunëscer nosta valeda a livel mundiel coche zënter de cumpetënza dl ziplé tl lën. Mo n auter var sarà chël de abiné sinergies danter l artejanat artistich y l turism. Nce cun l’Università de Bulsan ons bele tëut su cuntat, per ruvé povester ti ani a na culaburazion a livel de furmazion universitèra y de proiec.

La lies ne ti dà nia mé vita al luech, ma les fej nce da puent danter generazions y danter situazions sozieles desfrëntes. Les tën adum nosta sozietà ti pitan a uniun la puscibltà de crëscer adum te na cumenanza. Ulon inant sustenì la lies tres contribuc, dantaldut a chëla lies che fej atività per mutons y jëuni, acioche i posse se svilupé te n ambient sane y crëscer sciche persones.

Vivon te na sozietà che se muda scialdi aslune. Iust de gra a nosc truep candidac jëuni ons udù mo deplù la mpurtanza de avëi ideies frësces y soluzions che va pea cun i tëmps.

On udù che i jëuni à na gran ueia de fé y de se purté ite, sce n ti dà crëta: l ie mpurtant scuté su si prupostes y ti dé respunsabltà tla sozietà. De gran mpurtanza per nosc daunì ie iust la sensibilità di jëuni per la tematiches liedes al ambient.

Na gran ndesfideda sarà chëla de abiné soluzions cuncretes al problem di cuatieres massa cëres. L sistem dl frabiché alesirà ie una na forma cuncreta per ti judé.

Chireron inant la bona culaburazion cun la Nëus Jëuni Gherdëina.

La scola de ublianza y na bona istruzion che va pea cun i tëmps ie l miëur nvestimënt per nosc daunì. Nëus son dla minonga che la scola ne dëssa nia mé anjinië ca i sculeis ala vita, ma ëila nstëssa muessa vester vita per i mutons. L Chemun possa judé a realisé proiec danter scola y prufescions, lauran deberieda cun i jëuni, ti dajan la puscibltà de dì si minonga, purvé ora y viver la politica.

De gran mpurtanza ie nce la nfrastrutures, ulache nsenianc y sculeies posse lauré do n standard atuel. Ulon perchël purté a piz tl 2021 l proiet de derturazion dla Scola Mesana bele nvià via (ca. 2 mio. de €) y ti sté do ala manutenzion ordinera y straordinera dla scoles y scolines.

Te Gherdëina vëniel bele pità truep servijes. Nëus ulon purvé a i cunlië mo deplù danter ëi y nsci a miuré la cualità. Un n ejëmpl ie la “rë” per families FamiLiam, tres chëla che ulessan danter l´auter mëter n droa n proiet a sustëni de families jëunes.

Tres la consulta per l’integrazion ulons inò mëter a jì cursc de rujeneda y jites per jënt da oradecà per ti fé cunëscer nosc raion. Cun l proiet “Do scola” ulessans inò dé n aiut a families che à mutons che va tla elementera. L Matada sarà inant a despusizion de families y lies y ulon nce abelì la plaza dedora dal local cun n juech per pitli mutons. Deberieda cun nosta lies dal sport ulons lauré ora mo proiec per mutons per i mënsc da d’instà.

L fossa scialdi bel y drët a vester boni de mëter a jì, cun l aiut di chemuns y de d’autra istituzions, na cherta da d’instà per la families per se nuzé dla furnadoies a n miëur priesc.

Dassënn mpurtant saral abiné formes nueves per secudì la persones de tëmp, per vester anjeniei al debujën di proscimi ani. Savon che l sarà te nosc luech for plu y plu persones de tëmp y perchël se dajerons ju cuncretamënter cun chësta realtà per avëi tl daunì a despusizion nfrastrutures y sustënies adatei a si bujëns.

Te duc chisc proiec, che ulon mëter a jì a livel de valeda, ulons tò ite l plu che la va i zitadins te na forma partizipativa.

On la fertuna de avëi truepa lies dal sport che fej na boniscima atività cun i jëuni. Ulon sambën les sustenì inant. Ulon nce valuté la puscibltà de dé na man a mëter su na lia dal sport amatoriel, acioche i mutons posse pratighé sport per se devertì y se mantenì sani y nton, zënza l pëis dl agonism.

Na cuestion mpurtanta ie chëla dla palestres a Urtijëi, che ne basta nia per curì i bujëns no dla scoles no dla lies dal sport. N messerà tò tla mans chësta situazion y lauré ora prupostes per prejenté ti proscimi ani na soluzion.

On udù te chisc ani tan mpurtant che l ie a ti sté do ala manutenzion ordinera y straordinera dla cëses de chemun y dla infrastrutures n generel. On uni ann nvestì truep de chësc viers, ma mé nsci iel mesun mantenì i servijes per la cumenanza.

De majeri lëures per derturé su y renuvé la Cësa de Chemun ie bele scric ora y unirà scumencei d’auton. L resultat dl ntervënt sarà n chemun che va pea cun i tëmps, che ie daviert y plu linëus, per ti pité ai dependënc n bel post de lëur adatà a si bujëns, ma nce ai zitadins na sënta cumenela dënia de Urtijëi.