PRELITES 2020 - NCE TU IES URTIJËI!
Prelites per l daunì dl luech - LA STIMA A CHICHE TE STIMES!
Stimeda zitadines y stimei zitadins, la ie tosc inò tan inant: ai 3 de mei dl 2020 uniral inò lità l Cunsëi de Chemun. Per chësta ucajion se à coche dan n 5 ani metù su na grupa de lëur per purté inant l’idea de na lista unica.
Cie ie pa la prelites?
La prelites ie n sistem daviert per numiné la candidates y i candidac per la veles de Chemun diretamënter danter duta la jënt de Urtijëi. Duc i zitadins de Urtijëi che à l dërt de lité possa tò pert.
Co va pa la prelites?
Cun la zedula che on spartì ora a uni zitadin de Urtijëi che à l dërt de lité possen dé ju nchina cater inuemes de persones che te stimes y che dëssa te reprejenté sun Chemun. Na lista unica ie davierta a duc y ne n’ie nia lieda a n partit: posses nsci crì ora danter duc i zitadins, nce de n’auter chemun, cater persones che do ti minonga fossa adatedes a jì sun Chemun. N possa numiné cunselieres che ie bele sun chemun, ma sambën nce fé inuemes nueves.
Tenian cont di resultac dla prelistes uniral po’ damandà damprovia de se mëter a
desposizion per la veles de Chemun de d’ansciuda sun
na lista sëura-partitica.
Can y ulà vëniel pa fat la prelites?
La prelites unirà fates dai 20 ai 26 de jené 2020. Ntan chisc dis possen dé ju la zedula cun i inuemes te Bibliotech San Durich y te Cësa de Cultura a Urtijëi ti orars de giaurida, o lité tres internet jan sun la plata www.listaunica.eu y dajan ite l codesc che ie stampà sun la zedula.
Duc chëi che à mo dumandes possa nes cuntaté mandan na e-mail al’adres prelitesurtijei@gmail.com
Co possen pa lité?
N possa tò pert ala prelites dajan ju chësta zedula o litan tres internet. Uniun possa lité mé un n iede. Sce zachei lita tres zedula y tres internet ne vela chësta stimes nia.
Veles cun la zedula:
Sun chësta zedula possen scrì su al plu 4 inuemes de zitadins sëura 18 ani. L ie da scrì su inuem y cuinuem, y l vën sotrissà che l ie dassënn mpurtant junté mo una o gor de plu nfurmazions per fé capì avisa la persona che ie mineda, sce n cajo che l fossa de plu persones cun l medemo inuem, p.ej.: Mario Rossi de Pizaut / Max Mustermann, streda Trenker 100 / Anna Mëisules, nsenianta de scola ecc.
Veles tres internet:
www.listaunica.eu
Can y ulà?
Dai 20 ai 26 de jené 2020 posses dé ju la zedula dedite dala ntreda de Cësa de Cultura o tla Bibliotech San Durich a Urtijëi, ti orars de giaurida.
Chësta veles ie defin anonimes. L codesc ne n’ie nia lià a na persona. Tres l codesc possen mé cialé do che uniun ebe lità mé un n iede.
La prelites ie metudes a jì da:
Comploi Martina, Delucca Alex, Demetz Diego, Demetz Marina, Grossrubatscher Stefan, Kostner Matteo, Kostner Peter, Kostner Rudi, Moroder Laurin, Moroder Tobia, Obletter-Insam Claudia (Uridl), Obletter Lukas (Cudan), Perathoner-Meraner Silke, Piazza Marlies, Piccolruaz Grete, Runggaldier-Dissertori Mechtild, Sahini Besim, Senoner Ivan, Stuflesser Sara, Thaler Irina, Walpoth Bruno