I lëures tla Cësa de Cultura “Luis Trenker“ a Urtijëi ie finei via y l luech à giapà na bela gran sala nueva y moderna.
Ala fin de nuvëmber ie i lëures tla gran sala tla Cësa de Cultura unii stluc ju. L à durà n pue‘ plu giut per gauja de cërta tec- nologies che fova da mëter a jì, na cossa zitia y che à trat l dut n pue‘ plu n lonch. La sala ie drët garateda y l ie bele unì metù a jì de plu manifestazions tla sala nueva. L ie unì tëut la dezijion de la fé scura, acioche la sibe dut ntëur plu eleganta y manco frëida. L focus ie śën dut sun la paladina y cie che suzed iló. „L parëi de lën ntëur via ie di ani 1970 y l ie unì valorisà de plu cun i lëures fac. L bel fonz de lën tropical, nce chësc mo di ani 1970, ie unì sfrià ju y l ie unì dat ju uele, nia lach coche l fova dant. Nsci ti iel unì dat plu valor sibe al parëi che al fonz.“, dij l ambolt Tobia Moroder, drët cuntënt cun la sala nueva. D’ansciuda uniral fat n’inaugurazion ufiziela.