Ntan l’ultima senteda dl Cunsëi de Chemun de Urtijëi iel unì dat pro l proiet de mascima per slargë la streda Cuca tl tòch danter la Cësa Gardis y la ncrujeda cun la streda Sobosch. L unirà śën dat la ncëria per lauré ora l proiet definitif.
L ie bele truep ani che l ne n’ie unì fat puech y nia tl prim tòch dla streda Cuca: la ie scialdi ërta y strënta y sce l passa n gran camion pona ne resta plu belau deguna lerch per chëi che va a pe. La ie nsci periculëusa per chëi che va a spaz y i sculeies che va a scola. “On udù ite che l ie ëura de fé velch y perchël ons ulù lauré ora n proiet cun chël che on fat ora te ciuna direzion che ulon śën jì”, nes spiega l assessëur Rudi Kostner: “Per la segurëza de chëi che va a pe iel de bujën de n tretuar y perchël ulons slargë la streda y la fé plu segura”. Nce la populazion y chëi che sta tla streda Cuca à tl’ancuntedes che ie unides fates n generel dat da ntënder che l ie dessegur drët cialé de fé velch per la segurëza de duc.
Tl proiet de mascima laurà ora dal njenier Villotti y dat pro dal Cunsëi de Chemun, iel udù dant de slargë la streda Cuca dan- ter la Cësa Gardis y la ncrujeda cun la streda Sobosch. La streda dëssa vester dlonch 3 m lergia y leprò uelen mo fé n tretuar de 1,30 m. Ulache l ne n’ie nia lerch assé messeran strënjer l tretuar a 90 zm. Cie che l ie da dì, ie che l tretuar ne n’unirà nia fat plu aut che la streda, ma l unirà fat a na maniera che l ie saurì da desferenzië dala streda nstëssa, tres n auter fonz (sciche per ejëmpl tla fotografia publicheda tlo dlongia). Nsci resta la stre- da mpo lergia assé sce l ie de bujën de astilé ora danter doi auti, ma l ie nce saurì desferenzië per chëi che va a pe y per i auti ulache l fina la streda y ulache l scumëncia l tretuar.
La regulamentazion dl trafich sun la streda resterà sciche śën: n possa furné suvier y juvier nchin do la raida de Bruel, ma tl ultimo tòch possen mé furné juvier. Tla streda uniral nce fat na fermeda nueva per la curieres, plu avisa puech dan la cësa Cuca. L unirà nce metù lumes nueves y mudà ora n tòch dla rola dl’ega da bever. L proiet che ie unì dat pro ie n proiet de mascima, chël uel dì nia definitif, ma che dëssa mustré su l viers de chël che n uel lauré inant. Vëira iel nce che tl plan urbanistich iel te chësc tòch de streda bele udù dant y dessenià ite na streda bëndebò lergia, l grunt dlongia streda ne n’ie perchël bele giut nia plu da pudëi adurvé.
Sciche proscim var ti dajerà śën l Chemun su la ncëria a n njenier de lauré ora l proiet.