N proiet per i mëndri per fé muvimënt dut l ann
MUDA (muvimënt y devertimënt dut l ann) à coche fin chël de ti dé ala mutans y ai mutons la puscibltà de ntënder coche mu- vimënt posse purté sudesfazion y legrëza. MUDA sta nce per na maniera nueva de fé cunëscer plu sortes de sport ala mutans y ai mutons. Da mez setëmber 2021 inant arà la mutans y i mutons dla prima tlas dla scola elementera la puscibltà de purvé ora ntan dut l ann 6 sporc defrënc per un n iede al'ena. Uni sport vën fat 5 iedesc. Ndut se anconta la mutans y i mutons pona 30 ie- desc ntan l ann.
Bele d’autonn dl 2020 ova Janpiere Prugger rujenà de n tel proiet. Monica Pescosta y Martina Leitner, doi umans y cumëmbres dla lia VKE Gherdëina, fova ntujiastes de chësta idea y à pona d’ansciuda cuntatà Janpiere per s’la fé ora coche n pudëssa mëter a jì vel’ da de tel. L ie unì damandà nce l aiut a Monika Runggaldier, nsenianta de ginastica, che ova ani dant bele realisà n proiet de sport cun la scola. Do che n à metù adum vel’ idea, an cuntatà i assessëures al sport y al soziel de duc trëi i Chemuns de Gherdëina y duc fova mutivei de sustenì chësc proiet. Te chësta ucajion se à l’assessëura al soziel de Urtijëi Martina Comploi ënghe metù a despusizion per lauré pea te chësta grupa de lëur. Per realisé chësta idea ti iel unì damandà al VKE de Gherdëina, na lia che mët a jì d’uni sort de ativiteies per pitli mutons, sce i pudëssa mëter a jì chësc proiet. Nce da si pert fovel na resposta scialdi positiva y nsci à la lia deberieda cun la zentrela dl VKE de Bulsan tëut su chësc proiet. Cun na gran mutivazion à la grupa de lëur, metuda adum da doi reprejentantes dl VKE Gherdëina, doi dl Chemun de Urtijëi y una na maestra dat vita al proiet MUDA. L’idea fova nasciuda, ma l fova mé mesun la realisé cun la cunlaurazion dla lies dal sport, che à pona debota nce dat si despunibltà. Cun scialdi nteres da pert de chësta lies iel te puech tëmp unì metù adum n program che garantësc 220 ëures de sport. Menei dal gran ntujiasm da duta la pertes an proietà deberieda cun Irina Thaler l logo y l julantin per l proiet y prejentà l proiet ala jënt. Tl mëns de mei iel unì stlut ju l’iscrizions, ulache i mutons à pudù se crì ora una dla sies ativiteies sportives che i uel fé. L' autra cin ativiteies vën crisses ora a cajo dal team de urganisazion.
L ne resta nia auter che rengrazië de cuer duc chëi che fej pea pra chësc proiet y a duta la mutans y a duc i mutons ti mbincions n bon devertimënt cun l proiet MUDA!
