Park Urtijëi GmbH – nuviteies
Dan cater mënsc iel unì metù online la plata web, ulache n possa giapé duta la nfurma- zions sun la trëi strutures dla Park Urtijëi GmbH, che ie na sozietà dl chemun. L cunsëi dla sozietà, metù adum dai trëi cunselieres de chemun Claudia Insam, Ewald Moroder y Konrad Senoner, che ie l presidënt dla sozietà, à la ncëria de aministréy de cialé che l vënie fat i lëures che ie de bujën per mantenì y miuré la strutures. Ultimamënter iel unì fat de plu lëures. Scumencion dala plaza dal tennis ora a Runcadic, ulache l ie unì mudà ora de plu vieresc y l ie nce unì metù su ruló nueves. Chisc lëures fova de bujën per avëi na miëura ijulazion. Per chël che reverda la strutura dal tennis uniral proscimamënter fat de majeri lëures per fé a na maniera che l frabicat curespuend ala normatives de segurëza scrites dant al didancuei. Tla plaza dai auti via n Setil, che ie unida asfalteda, an depënt da nuef duta la risses blances. Leprò à i lauranc de chemun cuncià su l mur che fova melciafià y fat na sief nueva. Sëuraprò iel unì cumprà y metù su n defibriladëur che ie a despusizion tl cajo de bujën. Coche scrit dant dala lege an śën njenià n POS y n possa nsci paië nce tla plaza da parchejé Setil cun la cherta de credit. De plu lëures iel ultimamënter nce unì fat tla Garage Central, ulache l à lerch 220 auti. L tleca lecurdé la lumes nueves a led che ie unides metudes ju per la rampa y chësc do che bele dan n valgun mënsc fovel unì mudà ora la lumes te duc trëi i partimënc dla garage. Chësta lumes ne fej nia mé n bel linëus, ma les fej nce sparanië scialdi strom. Strom vëniel nce sparanià cun l sistem nuef de regulamentazion di cabli che ie tl plafon y che vën sciaudei a na maniera che l’ega ne dlace nia ruvinan de cunseguënza la muredes. Regulamenté l sciaudamënt di cabli uel dì che cun n sistem computerisà se sciauda i cabli mé canche la cundizions atmosferiches se l damanda y i ne vën nia sciaudei canche l ne ie nia de bujën. N auter miuramënt iel unì fat tl ciamp dla segurëza: l ie unì renuvà l sistem de cuntrol cun de plu y de miëura videocameres, che tol su dut chël che vën dant tla garage. Dan la ntreda uniral ti proscimi dis metù su na tofla luminëusa, cun chëla che n puderà dé nfurmazions scrites a chëi che uel lascé l auto tla garage. Lecurdon mo n iede che l ie a despusizion de duc i zitadins la “Happy Hour Card”. Chësta cherta giapen paian na cauzion de 10 euro y n possa la ciarië cun la soma che n uel. Parchejan cun chësta cherta ie la prima ëura y mesa debant. Uni ëura sëuraprò costa 1,80 Euro. Per chël che reverda l’atività de chëst ann iel da dì che la plazes da parchejé ie unides nuzedes scialdi. A chësta maniera iel unì trat ite de plu che ti ani passei y n à perchël pudù fé nvestimënc mpurtanc. Nvestimënc che fej a na maniera che la trëi strutures, la Park Central, la plaza da parchejé Setil y l zënter dal tennis vënie miuredes a bën di zitadins de Urtijëi y di turisć.