Per la Park Urtijëi ie l ann 2024 stat n ann ulache n ie stac boni de fé chël che n se ova tëut tant: ressanamënt dla strutura dal tennis, miuré la ntreda dla garage Central y aumenté la cumpëida de cameres per avëi n miëur cuntrol dla garage.
Per la plaza da parchejé Setil iel unì cumprà n container nuef cun laite la njinies sani- teres che fova de bujën. Sëuraprò iel da dì che de gra al sistem nuef, metù a jì dal assessëur per la mubiltà Stefan Kasslatter, che mostra cun tofles ulache l ie mo lueges da pudëi parchejé, iel nce stat manco auti che aspitova dan la plazes da parchejé. L proscimo var sarà chël de mëter a jì n si- stem ulache n à la puscibltà de apusté cun l fonin na luegia da parchejé.
L respunsabl Martin Resch ie tl lëur de se cruzië de mëter a jì chësta puscibltà nueva. Savon che la gran cumpëida de auti che vën da oradecà fej a na maniera che a Urtijëi ne iel nia saurì a giapé na luegia da lascé l auto. L ie for plu y plu dis ntant l ann che on chësc problem y l inj. Helmuth Moroder à laurà ora, tl cuntest dl Program de svilup cumenel y dl Masterplan dla mubiltà de Gherdëina, pruvedimënc per smendrì chësc problem. Fermé su i auti a Pontives, ti dajan la puscibltà ala persones de ruvé tl luech cun curieres, y na streda de zircunvalazion a Urtijëi ie doi pusciblteies sun chëles che n ie bele tl lëur de lauré.
Ma sambën saral mo de bujën de d'autra scumenciadives coche per ejëmpl chëla de aumenté la puscibltà di zitadins de se nuzé for plu y plu di City Bus. Tlo iel de gran mpurtanza che nce duta la populazion se tol dant cuncretamënter de ne tò nia ca l auto per furné tl zënter tl luech, ma de se nuzé for plu y plu dla curieres metudes a despusizion. Mé cun l cuntribut de duc saral mesun miuré la situazion dla mubiltà che devënta da ann a ann piecia. La desmustrazion che for plu auti ruva ite te nosc luech ie, danter l auter, nce la statistiches dla garage Central y dla plaza da parchejé Setil.