Bele ti ultimi doi ani iel unì fat plu sentedes danter l’aministrazion dl Chemun de Urtijëi, i presidënc dla lies sportives de Gherdëina y la/i diretëures dla scoles per ti jì permez ala problematica dla palestra.
Da chësta sentedes iel unì ora dantaldut l bujën dla lies sportives de na palestra per pëisc. L mond di alenamënc se à mudà scialdi ti ultimi ani y la lies devënta for plu prufesciuneles nsci che i alenamënc cun i pëisc ne ie nia plu da pensé demez sce n uel nce tenì pea y jì inant cun i standard de al didancuei.
Al scumenciamënt à l’aministrazion de chemun valutà n valguna opzions per na costruzion o n ampliamënt de na strutura bele a despusizion, ma pona an abinà na soluzion ideéla: n local sëuraite tla strutura dla palestra dla scola elementera tla streda Scurcià . N local che ne ie mei o puech unì adurvà ti ultimi ani. Do n sëuraluech deberieda cun l diretëur dla scola ITE de Urtijëi Bernhard Flatscher, an udù che l se trata de n local mo drët bën mantenì cun nce banies y locai da se mudé leprò y cun njins y atrezatures che ie jites purtruep dassënn ti ani y ne ie nia o rie da pudëi adurvé mo al didancuei.
 N à pona tëut la dezijion de cumedé su chësc local sciche l se toca a na moda che l possa unì adurvà dassënn dala lies. Te na grupa de lëur cun Janpiere Prugger, assessëur al sport dl Chemun de Urtijëi, Simon Stuffer, nseniant y trainadëur de sport y Elia Berti, nce ël trainadëur de sport y che lëura adum cun de plu lies dal sport, an laurà ora n cunzet per cumedé su la palestra cun njins ala moda tenian cont di bujëns de n pue’ duta la lies dal sport dla valeda.
Do n valgun mënsc de lëur y nchin che n à nce apustà dut y njenià ca, ie la palestra śën njenieda per pudëi unì nuzeda. Davia che l se trata de na strutura provinziela, se à la scola ITE cruzià di lëures y l Chemun de Urtijëi à finanzià l proiet cun n cuntribut ala scola.
N spera che chësc ntervënt ti jude scialdi ala lies sportives de duta la valeda, che à nsci n post sëuraprò ulache i possa se alené cun d’uni sort de njins y atrezatures. Y dal’autra pert speren nce che l jude a alesiré n pue’ la prescion sun la palestres che ie bele y che vën for dassënn adurvedes. L dut cun n cost adatà , nia da cunfrunté cun l cost de na strutura nueva.
La lies sportives possa apusté la palestra tres la scola ITE.
N gran rengraziamënt ti va al diretëur dla scola ITE Bernhard Flatscher per si despunibltà y la bona cunlaurazion y ai trainadëures Simon y Elia per si cuntribut pru- fesciunel.
