L Chemun à messù ressané l local dla proves dl Cor Raetia y dla Lia dal scioh tla Cësa de cultura de Urtijëi: l ie unì miurà la statica dl local y fat n sussot acustich nuef.
Tla Cësa de cultura uloven fé da nuef l sussot acustich de n local tl segondo partimënt, l se trata plu avisa dl local dl Cor di ëi Raetia, che à da permò festejà cun n cunzert si sessant’ani, y dla Lia dal scioh. Chësc per ti dé na miëura acustica al local, davia che i ciantarins dl Cor Raetia ti ova damandà al Chemun sce l ne fossa nia mesun fé zeche per miuré l local y pudëi nsci fé proves te na luegia plu adateda al cianté. L Chemun fova a una y à nsci tëut tla man chësc proiet. Ma canche n ulova scumencé cun i lëures, chëst ann d’ansciuda, se an ntendù de n problem de statica y te chël mumënt an riesc messù śaré l local.
L ie nsci unì nciarià n njenier che à fat n stude sun co fé per mëter n segurëza l local. L ie nsci unì nciarià la firma de muradëures Gebhard, che à al scumenciamënt de setëmber metù man cun i lëures. Per renfurzé l sussot an messù mëter ite de gran trames de mitel lassù via y śën iesen tl lëur de fé l sussot acu‑ stich, coche n ova pensà de fé bele d’an‑ sciuda. N spera dassënn che la lies posse de utober inò se nuzé dla sala per si atività .
Davia che n à messù mëter su n gherist per pudëi auzé ite i trames da viere, an tëut nce l’ucajion per ti dé ju na man de forba ala cësa, davia che l fossa mpo stat tosc da fé. N se à nsci sparanià de messëi n auter iede inò mëter su n gherist aposta.
L ie perdrët stat na fertuna che n se à ntendù per tëmp y ëura che l local, che n ova fat su te n segondo mumënt cun trames de lën, ne fova nia al orden. Nsci possa śën la Lia dal scioh y l Cor di ëi Raetia se ncunferté sun na bela sala nueva y al orden.