Tla materia de educazion zivica ie i sculeies dla prima tlas dla scola mesana cun la maestres Ines Hofer y Marion Demetz jic a ti cialé ala Cësa de Chemun a Urtijëi.
I sculeies ie unii menei tres i ufizies dl Chemun y i cunlauradëures ti à spiegà cie che l vën fat y de ciuna cumpetënzes che n à de bujën per lauré te Chemun. Ëi à fat truepa dumandes y fova dassënn nteressei al’atività cumenela.
L’ena do ie i sculeies jic n segondo iede te Chemun, plu avisa tla sala dl cunsëi. Te scola ai danora cris ora la cuestions che ëi à pona tratà te na “drëta“ senteda de n cunsëi de chemun, monce cun i microfons. Al scumenciamënt ti iel unì spiegà n curt la situazion politica de Urtijëi, cie che ie n Cunsëi y na Jonta, cie che l uel dì vester assessëur y cunselier, ciuna funzions che à l ambolt y nsci inant. Pona iel unì lità dai mutons n ambolt che à menà la senteda, la cunseliera Sara Stuflesser à fat da secrete- ra y ti judova. L pont al orden dl di fova la plaza da fé damat sa Fussel de Nis. L ie unì spiegà n generel la problematiches defrëntes de chëles che l ie da tenì cont canche n uel mëter n droa n proiet. Do avëi tratà la cuestions, ti spiegan avisa che l ie na simu- lazion de na senteda de cunsëi, à la maiu- ranza lità per n ciamp dal palé nuef cun fonz sintetich y rëies ntëur via y n percurs da fitness do troi su nchin tla streda Grohmann. L ie stat per duc na bela esperienza, i sculeies à pudù mparé truep y cunëscer si dërc y si duvieres y i se à rendù cont dla mpurtanza dl dialogh, dl respet per d’autra minonghes y dl valor de nosc sistem poli- tich democratich.