L cunsëi dla lia Banca dl Tëmp Gherdëina à dat ju si ncëria. N chier zachei che sëurantulëssa la lia y ëssa ueia de purté inant chësta idea de se giamië servijes y se judé un cun l auter.
Ntan si reunion generela straurdinera ai 24 de mei dl 2023 à l cunsëi dla lia Banca dl tëmp Gherdëina dat ju si ncëria. Per gauja dl virus corona se à l’atività dla lia fermà y n ne n’ie nia plu stac boni de la mëter a jì. La lia fova nasciuda cun l’idea de mëter su na istituzion soziela zënza fin de davani, ulache i cumëmbri ëssa pudù se giamië ora servijes y ativiteies zënza paiamënt. Per uni ëura de lëur che n fej per i autri cumëmbri possen se damandé ëures y servijes de chëi che n à de bujën.
Ciuldì che l cunsëi dla lia Banca dl tëmp Gherdëina ne n’uel nia plu fé inant y cie che n se nmaginea per l daunì, chël ti ons damandà al presidënt dla lia Ludwig Mo- roder y al’assessëura dl Chemun de Urtijëi Martina Comploi. Nce i trëi Chemuns de Gherdëina y chël de Ciastel, per cie che à da nfé cun la frazions ladines, à sustenì la lia y si atività.
Can ie pa unida metuda su la Banca dl tëmp Gherdëina?
Ludwig Moroder: La lia ie nasciuda tl 2018 dala grupa de lëur che se ova abinà plu iedesc per mëter su na banca dl tëmp te nosta valeda. Dla grupa de lëur fajova pert ulenteres, ma nce reprejentanc di trëi chemuns de Gherdëina. L’idea zirculova bele plu giut, ma deguni ne l’ova mo me-tuda a jì. L fin dla lia ie chël de ti dé la puscibltà ai cumëmbri de se judé un cun l auter, dajan y se damandan tëmp. Ma dantaldut ulans fé a na maniera che la jënt posse se cunëscer y se ancunté.
Co ie pa pieda via l’atività dla lia?
Ludwig Moroder: Al scumenciamënt fovel n gran nteres. Iló ans metù a jì trëi sëires de nfurmazion d’ansciuda dl 2019. Trueps se à scrit ite y an nsci feter 70 cumëmbri. Tl prim ann de atività iel unì mudà ora 18 servijes per de ndut 22,5 ëura de tëmp. L ie unì giamià ora danter l auter puzené vieresc, fé tëurtes y tiramisù, cunversazion tla rujenedes tudëscia y nglëija, cumpré ite oradecà, scurté breies, cumedé castli, suné pra na festa y nsci inant. Aldò dl tëmp che n adrova a fé i servijes possen se da- mandé da d’autri cumëmbri d’autri servijes. Tl 2020 iel unì l covid y chël à fermà duta l’atività, ajache l fova descunsià de se ancunté. Canche l fova finà via, ons inò cialà de mëter a jì l’atività, ma la ne n’ie nia plu unida a s’l dé.
Ciuldì pa, cie iel pa suzedù che la ne n’ie nia plu unida a s’l dé?
Ludwig Moroder: Te chisc ultimi ani ons udù ite che povester mancel l nteres, povester ne n’iel nce nia chësc bujën de se ancunté y de se baraté ora servijes tres na banca. Povester iel plu saurì a se fé n plajëi zënza scrì ora zedules. Tl cunsëi sons nce mé plu de cater, davia che l ie unì a mancë Heidi Perathoner che ie dal scumenciamënt for stata leprò y fajova nce l servisc de nfurmazion tla biblioteca de Santa Cristina. Danter l’atività dla Banca dl Tëmp fovel nce chëla de ti pité ai cumëmbri ëures de giaurida per respuender a dumandes y stlarimënc.
Martina Comploi, nce i chemuns à dal scumenicamënt credù te chësta idea dla banca dl tëmp.
Ciuldì ratëis’a che la ne n’à nia tan butà?
Martina Comploi: Chësta banches dl tëmp ne se fej nia saurì, ajache duc uel dé, ma puec tol. Sce l ne n’ie deguni che se da- manda i servijes y i lëures, pona ne possa nce deguni dé y scinché tëmp. La jënt se stënta a damandé n aiut.
Cie suzedel pa śën cun la lia?
Ludwig Moroder: On fat ora de ti fé cunnëscer ala jënt chësta dezijion dl cunsëi. Ulon mo lascé la lia davierta nchin ala fin de lugio, sce zachei ëssa nteres de la pië do. Sce deguni ne se lascia audì, pona vën la lia stluta.
Martina Comploi: La lia ie fata, l ie n bel proiet. L ie duta la fundamëntes per pudëi pië via cun l’atività. Povester iel zachei che à ueia y crëia te chësc proiet, povester na grupa che uel se nuzé di servijes dla banca y se giamië ora. Ulësse tlo nce rengrazië l presidënt Ludwig Moroder y dut l cunsëi – Gabi Senoner, Gretl Senoner de Ronc y Marion Perathoner – per chël che i à fat y l gran mpëni te chisc ultimi ani.
Sce zachei ëssa nteres de purté inant la lia o ulëssa savëi velch de plu sun chësc pro- iet, pona possel gën cuntaté nchin ala fin de lugio l presidënt Ludwig Moroder: tel. 335 8053983 e-mail: info@bancadltemp.com Per de plu nfurmazions: www.bancadltemp.com