Uni ann vëniel dal Chemun fat de plu lëures per tenì al orden la stredes. Ulache l ie unì metù ju asfalt chëst ann, cie che n à scenó mo dut cumedà y cie che ie mo da fé.
Coche uni ann cëlen bele via per l inviern de crì adum n pue’ de stredes che à de bujën de unì cumededes ca y ulache n muessa fé da nuef l asfalt. Pona iel da fé n pitl proiet, che vën de regula fat dal geometer de chemun Wolfgang Mussner. Da dedò iel da scrì ora i lëures y cialé sce vel’ firma se pieta de i fé. Nce chëst ann iela jita nscila, coche nes conta l assessëur Rudi Kostner ne n’ie i lëures do la rata nia unii scric ora tan tert, ma mpo se ala trat n lonch: “N cëla for de fé i lëures tl scumenciamënt de juni o al plu tert ala fin de juni, ma chëst ann se à la firma che à venciù l cuncors, la Varesco de Bulsan, tardivà n pue’ ajache la ova n drë note. Ala fin dla finedes iela permò unida de lugio y nscila ne n'ons nia pudù fé duc i lëures mo dan l instà.”
Sun la promenade à la firma Rottensteiner auzà l troi y metù ju roles, a na maniera che l’ega dla plueia posse arsì miec y ne vede nia persëura.
Asfalt nuef via n Setil y ju n Ch’l Busc
De lugio iel nsci unì fat da nuef l asfalt via n Setil, dan l cantier de chemun. L se trata de n raion tl Chemun de Ciastel, ma davia che la streda y la plaza vën nuzeda scialdi dai lauranc de Chemun de Urtijëi y la fova scialdi melciafieda, fovel gran ëura de fé velch. “L Chemun de Urtijëi à lavia nce la plaza da lascé i auti, dla Park Urtijëi, y perchël ons udù drët de fé chël lëur y śën ie lavia dut fat bel a puntin”, à spiegà l assessëur Rudi Kostner.
Daldò à l Chemun nce mo fat l asfalt nuef dlongia l Garnì Vanadis a Urtijëi: do che i à stlut ju i lëures per l troi dala rodes iel sun l troi, ma nia mé, nce sun streda y te na pitla plaza da lascé i auti unì fat da nuef l asfalt.
Lëures su per Ch’l Piz
Tl tòch de streda danter l Gran Puent y Costamula, ulache l ie ti ultims tëmps unì frabicà scialdi, ova l furnitëur dla lectrisc Edyna dan doi ani metù ju na rola dal strom nueva: perchël messova nce la firma se cruzië de mëter ju da nuef l asfalt y chël ie śën d’autonn nce unì fat.
Pona iel nce mo unì fat n lëur tla streda de viers de Runcata: dessëura pert an fat n pitl canal per pië su l’eghes che vën da Resciesa ju y per les auté demez. D’ansciuda uniral mo metù ju n asfalt nuef.
Da Val d’Ana ite
Pra la streda de viers de Val d’Ana ova l Chemun d’ansciuda taià ora de plu lëns che strenjova ite la streda y fajova n drë scur. Y pona fovel nce da fé asfalt. Davia che l chemun se ova udù ora la puscibltà de damandé n cuntribut per chisc lëures a Bulsan, an n mumënt aspità dan scumen- cé per dé ju duta la dumandes. Ma pur- truep ne n'an ala fin mpo nia giapà n sustëni, davia che l se trata de na streda che ne n’ie nia davierta a duc. Śën d’autonn an metù ju la roles per l internet asvelt y d’ansciuda fajeran pona mo l asfalt da nuef.
D’autri lëures mo da fé
N ëssa mo ulù asfalté l tretuar dal Purger ju, plu avisa dala ncrujeda dai destudafuech nchin dal hotel Luna, ma l proiet ie tumà tl’ega, ajache iló vëniel giavà su l tretuar per mëter ju n internet speziel per la Caserma di carabinieres y daldò uniral nce asfaltà. Nsci fovel per nia l fé bele śën dan che i lëures scumëncia.
Nce dal Gran Tublà ora iel n tòch de tretuar ruinà che n ëssa ulù fé da nuef. Ma davia che l furnitëur dla lectrisc Edyna fajerà te chël raion tosc na cabina dal strom, do che l ie unì frabicà truepa cëses nueves, an messù lascé tumé l proiet. Te n segondo mumënt, do che i lëures per la lectrisc sarà finei, uniral nce tlo metù ju n asfalt nuef.
Lëures sun la promenade
D’autonn an nce mo nciarià la firma Rot- tensteiner de fé de mëndri lëures te nosc luech. L Chemun à fat n cuntrat cun chë- sta firma per de ndut trëi ani, la nciarian a fé de mëndri lëures a priejes scric dant per na cërta soma al ann. A chësta maniera possen man man fé i lëures che ie de bujën, plu debota y zënza messëi uni iede daman- dé preventives y crì firmes nteressedes.
Sun la promenade, puech dan la plaza dai juesc de Col da Brida, ne trajova l’ega nia ju sciche l se toca y canche l pluvova jive- la sëurora de viers dla cëses che ie dessot. D’autonn à perchël la firma Rottensteiner auzà su n pue’ l troi da jì a spaz y metù dedite pert ju roles per abiné su l’ega. N spera nsci de avëi miurà la situazion.
Mplu fajerà la firma mo vel’ lëur tla garage Park Urtijëi pra vel’rola dal’ega y te d’autra lueges cumederala su la lumes de streda. L ie for inò vel’ un o vel’ una che fir ite cun l auto tla lumes y perchël ieles for inò da cumedé su, fajan na fundamënta nueva y les erjan su.