L assessëur ala stredes Rudi Kostner nes conta di lëures che ie da fé danter la capela di tumei y la cësa Plajes.
La streda Sacun unirà cumededa ca te plu posć. L prim tòch de streda ie bele unì ressanà, suinsom dlongia l Jakoberhof. Davia che l fova scialdi de bujën de cumedé nce l prim tòch che va dala capela di tumei nchin dala cësa Plajes, an messù tò tla man chësc de prëscia. L tretuar dà do y i mures sotite ie bëndebò stlec. I mures dà nce sëura sun n fonz, da sablon, che manacia de unì ca. Nscila an messù lascé fé n’analisa geo- logica da n geologh che à dat dant cie che l ie da fé. Ntant iel unì metù su la roles che ëuta l'ega ju te ruf, acioche la ne slavateie nia ora l fonz. Chësta roles che ie da udëi resterà nce dadedò, ma l unirà dat ju culëur a na maniera che les ne saute nia tl uedl. L ie pona unì fat n proiet per fé chësc tòch da nuef. L unirà metù ju micropali che fora ju bëndebò sot tl crëp, che ie bon y dëssa tenì su la streda. Daldò vëniel cumedà su i mures y l tretuar. Tretuar n saral un, doi metri lerch, dala pert de ruf. Sce dut buta possen scumencé cun i lëures chëst ann. N puderà for passé, mesa streda sarà for davierta per pudëi furné sa Sacun. N se nuzerà dl’ucajion per mëter ju nce l cabl per l internet asvelt y n cabl nuef dala lectrisc. La nfrastrutures sotite ne unirà nia tuche- des ajache les ie mo bones. Dut cant costa 490.000 euro, leprò vëniel la chëutes CVN, la spëises tecniches y na soma sce n cajo che vel‘ lëur ëssa da unì sëuraprò, per ndut 660.000 euro. Speron che n possa tosc ti sauté ite, ajache l ie ëura de fé zeche.