L Cunsëi de chemun à dat pro vel’ mudazion al regulamënt dla curtina de Urtijëi.
La curtines ie na pert fundamentela dla cumenanza y dl cialé ora dl luech; les spidlea l amor di familieres per si defonc y mostra su coche la jënt dl post viv la religion y si cultura. Te na bela curtina iel da tenì orden y nët. L regulamënt de cur‑ tina ie tlo per garantì dut chësc.
L Cunsëi de chemun à de lugio dat pro vel’ mudazion al regulamënt dla doi curtines de Urtijëi, chëla de Sant’Anna y chëla de Sacun. L se trata de mudazions che reverda l spander de cënder, ma nce vel’ pitla mudazion sun coche la fòsses dëssa cialé ora y l raion da stierder cënder coletif.
Coche bele da for, iela nscila che spander l cënder ie aldò dl codesc penel mé cun‑ sentì sce la persona morta à fat n vita na detlarazion de ulentà. Spander l cënder ie cunsentì dedite te curtina te n raion che ie udù dant aposta o te na fòssa de tiera metan sota tiera n cuntenidëur de material biologich che cuntën l cënder. L ie nce mesun spander l cënder ora de curtina, ma mé te cërta lueges scrites dant dal Chemun y cunsentides dala lege.
Nuviteies n cont dl raion da stierder cënder coletif
L Cunsëi de chemun à fat ora che per la prima sëurandata de na cunzescion per l raion da stierder cënder coletif ne n’iel da paië degun tribut de cunzescion, coche nce per la sëurandata de na cunzescion per na fòssa singula, per mutons o per urnes. La cunzescion vel per vint ani, avisa tan giut coche nce per l’autra fòsses ora de chëles de familia y chëles sota l’arcades, ulache la dureda ie de 25 ani. Do i prim vint ani possa la cunzescion per l raion da stierder cënder coletif unì renuveda per mo n iede tan de ani, paian l tribut per renuvé la cunzescion. Chëi che à na cunzescion per l raion da stierder cënder coletif, ne paia nia l cuntribut anuel. Pra l raion da stierder cënder coletif iel cunzedù ai parënc de mëter n cëir, coche pensier ai defonc. La decurazion dla fòssa cun ciofs y n.i. vën fata dal cunlauradëur de curtina.
Nuviteies n cont dla decurazion dla fòsses
La curtina dl Chemun de Urtijëi ie penseda coche curtina sun pra. Sce n ulëssa mpo mëter n ëur, possen l fé ma mé de mitel scur o cun de pitli sasc naturei dl luech, tenian ite la lunghëza mascima de 60 cm y de 40 cm de larghëza dal monumënt de fòssa y sun ndicazion dl cunlauradëur de curtina. I ëures lerc y auc che ie mo unirà damprovia tëuc demez. I monumënc de fòssa dëssa, sce la va, vester de sas de nosc raion te si forma naturela (nia limà o taià), de lën o de fier batù scur, bront o scenó de n auter mitel scur che passenea ite. Mitei linëusc y lucënc, coche per ejëmpl acel inox ne ie nia lascei pro. L Cumité de curtina tol la dezijion sce n monumënt de fòssa ie aldò dla regules y adatà. La creazion de na decurazion pra fòsses singules, de familia o per urnes ie cunsentida, ma la ne daussa nia vester majera de 60 cm de lunghëza y 40 cm de larghëza dal monumënt de fòssa.
Nuviteies n cont dla plantes y di cëiresc
Per cie che reverda i ciofs y la plantes che n sënta sun la fòsses, iel unì fat ora che n dëssa mé pudëi adurvé de pitla plantes dl luech.
N cont di cëiresc sun fòssa muessen dassënn cialé de schivé cuntenidëures de plastica y de d’autri materiai che mpestea l ambient. Tl automat dai cëiresc sun curti‑ na vëniel śën pità nce cëiresc te carton y n ie tl lëur de cialé sce l fossa nce puscibl n pité de tei te scipa.