I lëures per fé da nuef l verzon dla scola mesana va inant y n ie laite ti tëmps che n ova udù dant. Per la fin de utober puderà i sculeies se nuzé dla lerch nueva.
Ala fin dl ann de scola 2022/2023 oven bele riesc scumencià cun i lëures per fé da nuef l verzon dan la scola mesana y na garasc nueva tulan nsci demez i auti dan scola. La firma Gebhard de Laion à sëurantëut i lëures y l Chemun ie nchinamò drët cuntënt de coche la ie jita. La firma de muradëures lëura drët bën, nce l architet dl proiet Han- nes Mahlknecht ti sta for do ai lëures y nsci iesen śën bele a n bon pont. N à zarà ju la scela de viers dla cësa di studënc “Assudëi” per la fé mo su da nuef dan che l scumëncia la scola. L ie da dì che tl prim messerà i sculeies se nuzé dla ntreda sotite, nia de chëla prinzipiela, la- scian la rodes dlongia la Scola d’Ert ulache l Chemun à anjenià ca na luegia aposta.
Canche i lëures sarà pona finei, n spera per la fin de utober, puderan inò jì danite y l sarà da garat tl verzon nuef dla scola n gran stender per la rodes cun doi par- timënc. Iló saral lerch per setanta rodes, davia che n à udù che i sculeies vën for plu y plu a scola cun la roda.
I mutons y la mutans giaperà nce n bel verzon, ulache i puderà fé la pausa, ma nce fé lezions o se ancunté dan y do scola. I auti ne n’unirà nia plu lascei dan porta, ma abinerà na lerch tla garasc nueva. Nsci saral dessegur truep de davanià per i sculeies.
