L puent dl Scioler vën stlut defin ai auti, ma n puderà passé via l ruf a pe
Do che l piec dl inviern ie passà, va i lëures dal puent dl Scioler inò inant. N fova muec cun l’idea che n ëssa for pudù lascé davierta una na cursia dl puent, coche l fossa stat la ulentà dl Chemun, ma do che n ova scumencià a giavé permez ala fun- damëntes oven, sun cunsëi dla firma che fej i lëures y dl njenier cumpetënt, udù ite che la segurëza dl puent ne fova nia plu data. Nscila an messù tò la dezijion de stlù l puent defin.
L assessëur Rudi Kostner fej al savëi che l prim var che n à perchël messù fé, ie stat chël de spusté duta la nfrastrutures che passa sun chësc puent, les fajan passé sota ruf ora. N lëur da stramp zite, se tratel pu de na rola dal gas che servësc belau dut l luech, sëuraprò iel mo i cabli dal strom, dal telefon, la fibra y vel’ autra pitla rola. Nce la cabina dal gas, che fova iló sota puent ite, ie unida spusteda y à giapà si luegia dal’autra pert de ruf do l “infopoint” dla Lia per l turism. Danz che nscila ne puderan per n pez nia plu se nuzé de chësc puent. Cun l auto muessen fé la raida. Per chëi che va a pe vëniel njenià n troi da passé sëura ruf via. La majera mudazions à da nfé cun la fermedes dla curieres. Les ie unides spu- stedes coche n vëija sun la fotografies.
L assessëur per la mubiltà Stefan Kasslatter nfurmea - do avëi fat ora dut a puntin cun i polizaies de chemun y cun chëi dla SAD - che la fermedes dal 181 y dal Vanadis ie unides spustedes sun la Tresval. La fermeda dal Hotel Luna ie tumeda demez y chëla dan i Destudafuech ie unida spusteda tla streda Purger, n pue’ plu insù. La curieres de linia furnea nsci dal tunel su per la Nord-Sud, raida tl rundel dl Purger y tol pea la jënt a unì juvier dan la streda da jì ora dla Garage Central. Davia che l ie nsci mé una na fermeda vëniel cunsià de cialé avisa te ciuna curiera che n sënta ite.
Ala fin d’auril messëssen vester cun i lëures tan inant che n ie ora dl’ega – coche scrit dant dal Ufize provinziel per i ruves da mont ("Wildbachverbauung") – davia che canche l dlëiga la nëif y l vën de majera eghes, possel vester periculëus. Canche l puent sarà fat, uniral mo fat la spuendes, l tretuar, asfaltà y finà via cun duc i lëures ntëur ite per stlù ju dut per la fin de juni. Speron che l tëmp y dut jude pea, che l ne sibe nia problems sëuraprò y speron nce che la jënt ebe cumprenscion.