L Chemun de Urtijëi à metù a jì chësc instà deberieda cun l Chemun de S. Cristina y l Chemun de Sëlva per l segondo iede l “Instà vif”.
Deberieda cun sies lies an ulù ti pité ala mutans y ai mutons dla scola elementera y mesana na puscibltà sëuraprò per fé sport y vester creatifs ntan l instà. La sies lies che à fat pea chëst ann ie l FC Gherdëina, l Skiclub Gherdëina, l Tennisclub Urtijëi, La Vëta, l Hockey Gherdëina y l Eis Club Gherdëina. L’ultima doi lies à chësc instà fat pea l prim iede. L “Instà vif“ ie jit dai 20 de juni nchin ai 26 de agost y à pità de ndut nuef enes de sport y creatività. L ie unì fat d’uni sort de ativiteies, da juesc sun dlacia o sun l ciamp dal palé, a stlupeté cun l stlop da biatlon, a tennis, a eserzizes de coordinazion, a mudelé y vester creatifs y nsci inant. L ie stat n instà plën de devertimënt per la mutans y i mutons de duta la valeda, y speron che nce n auter ann vede inant chësc proiet.
MUDA 2021-2022
L V.K.E. de Gherdëina cun Monica Pescosta y Martina Leitner deberieda cun l assessëur al sport dl Chemun de Urtijëi Janpiere Prugger, cun l’assessëura ala families dl Chemun de Urtijëi Martina Comploi y cun la nsenianta de ginastica Monika Runggaldier ova metù a jì n proiet per l ann de scola 2021/2022 per la mutans y i mutons dla prima tlas dla scola elementera (ann 2015). L proiet ti à dat la puscibltà a uni muta y mut de mparé sies sporc defrënc ntan dut l ann. De ndut iel stat 30 domesdis de sport, chël uel dì che uni muta o mut a pudù purvé uni sport per 5 iedesc. L fin de chësc proiet ie propi chël de ti dé la puscibltà ala mutans y ai mutons de purvé ora y de fé d’uni sort de sport tla prima tlas per pudëi pona crì ora l sport o i sporc che ti plej l plu.
L ie n proiet nuef che dëssa ti dé na sburdla ala mutans y ai mutons de fé sport bele da pitli insù y tl medem tëmp nce ti dé na man ala lies per abiné atlec per l daunì. MUDA va inant nce chësc ann de scola y speron sambën nce daldò.
Per tramedoi proiec ti va n gran de gra a duc chëi che à judà pea, a duta la lies, ai alenadëures dla lies, ai Chemuns de Gher- dëina y sambën a duta la mutans y duc i mutons che à fat pea!