L Cunsëi de Chemun de Urtijëi uel dé n sëni n cont dl balanz ecologich
Tla senteda dl Cunsëi de Chemun ai 28 de dezëmber iel unì dat pro la delibera de mascima de adurvé curieres a lectrisc o cun deguna emiscions tl trasport publich tl luech. Chësc pont ie unì purtà dant dal’assessëura per l ambient Claudia Insam y l ie unì dat pro da duc i cunselieres. Cun chësta delibra de mascima uelen nciarië l ambolt y la jonta cumenela de ntervenì pra l’aministra- zion provinziela, acioche la curieres adurvedes dal cunzescioner nuef per l servisc de trasport sibe cun energies nëtes. Dut chësc per ti jì do a nosc duvier de miuré la cualità dl’aria, nsci Claudia Insam.
L Chemun de Urtijëi uel fé da ejëmpl cun n trasport publich sustenibl per l ambient y dé n cuntribut per la scunanza dl tlima. L ambolt Tobia Moroder y l assessëur per la mubiltà Stefan Kasslatter sotrissea la mpurtanza de chësta dezijion de mascima y detlarea la despunibltà de lauré deberieda cun la Provinzia per arjonjer chësc travert che possa vester n model per d'autri chemuns. L ambolt auza ora che chësta curieres ie bele unides purvedes ora y che les funziunea nce tlo da nëus. L assessëur Stefan Kasslatter se mbincëssa che a Urtijëi unissel nvià via chësc proiet pilot che fossa dessegur nce mpurtant a livel de retlam turistich, ajache n pudëssa ti pité ai truep seniëures n servisc de trasport publich plu ecologich che va pea cun i tëmps y tres chël se fé n bon inuem ora per l mond.
L cunselier Ewald Moroder fej la pruposta, che ie pona nce unida azeteda, de damandé ala Provinzia che l vënie baratà ora per primes la curieres che va da Monte Pana a Sautaria per la sensibltà dl raion ulache l ie la funtanes dl’ega de Urtijëi.