Al scumenciamënt de nuvëmber iel unì scumencià cun i lëures per l troi dla rodes “Rodaval” a Urtijëi, plu avisa danter l puent de Ronc y la streda Rumanon. L proiet “Rodaval” cunlierà Runcadic cun Plan.
Bele ti ultimi ani an realisà la pert dl proiet sun la pert de Ciastel, dal puent de Setil ora sota l cantier de Chemun y a pèr dl purtoi de Ronc ora. Nce l puent japé de Ronc dlongia l rundel de Petlin toca pra chësta pert. L proiet, che fova unì spartì su sun doi pertes, ie pona restà fërm, ma al scumenciamënt de nuvëmber de chëst ann an finalmënter pudù scumencé cun i lëures danter l ruf Derjon y la streda Tresval ora. L troi dla rodes passerà pona sot ala streda Tresval ora, l unirà fat n sotpassaje. Da iló jiral oravier n tòch dlongia la streda Tresval, dan la Gran Cësa via nchin japé dla streda Rumanon.
Ulache l se fërma la curieres passeran via la streda per se cunlië cun la promenade, per pona jì do la streda Praruf ora nchin tl raion artejanel nchin dal Zënter dal tennis. Śën vëniel realisà la segonda pert danter l puent de Ronc y la streda Rumanon, che ie dessenià ite tla grafica che n vëija . Gran pert dl proiet "Rodaval", che cunlieia cun n troi dala rodes duta Gherdëina, ie coor- dinà dala Cumunità raion Salten-Scilier (Bezirksgemeinschaft Salten-Schlern) n culaburazion cun i chemuns dla valeda. La Cumunità dl raion se cruzia de fé i proiec, de scrì ora y fé i lëures; i chemuns muessa se cruzië dla pert urbanistica y dla des- punibltà di grunc.
Chësc proiet tl tòch che reverda Urtijëi ie bele giut sun mëisa y l fova bele njenià dan feter cater ani. Ma per pudëi jì inant bele ntlëua fovel l problem che l Chemun de Urtijëi ne ova mo nia la despunibltà dl grunt dan la Gran Cësa via, dlongia la streda Tresval, per gauja de n recurs dan suneria pervia dla trassa. Tla segonda istanza dan suneria (Cunsëi de Stat = Consiglio di Stato) à l Chemun de Urtijëi giapà rejon y nsci à la Cumunità raion Salten-Scilier pudù scrì ora i lëures de chësta segonda pert.
Ndut costa chësc tòch de troi dla rodes dla segonda pert 546.728 euro, chësc ie l priesc aldò dl cuntrat stlut ju dala Cumunità raion cun la firma Globalbau srl. L proiet nstës ie unì laurà ora dal studio de njeniers Pfeifer Partners GmbH. I lëures jirà inant do ruf ora nchin pra l sotpassaje, che unirà pona fat d’ansciuda dl ann che vën. Iló jirà i lëures pona inant dal'autra pert dla Tresval do pra ora.
N cont dl proiet “Rodaval” dij l ambolt Tobia Moroder: “Duc i Chemuns de valeda se mpënia da ani deberieda cun la Cumunità raion Salten - Scilier a realisé i tòc che mancia mo. Te n’ancunteda dan n valgun mënsc cun l Presidënt dla Provinzia Kom- patscher iel unì mpermetù i finanziamënc da pert dla Provinzia ala Cumunità raion per pudëi purté a piz dut l proiet, ndut ca. 3 milions de euro. Nsci saral mesun de cunlië finalmënter duc i luesc de Gherdëina. Ie pënse che l sibe mpurtant sibe per chëi da tlo, per ti pité na alternativa nteressanta al auto, che nce per l turism, ulache la roda giapa da ann a ann plu pëis.”
L tòch da Runcadic a Pontives, drët mpurtant per i trueps che va a lauré tl raion artejanel de Pontives, ie n gran pert tl Chemun de Laion y ie perchël coordinà dala Cumunità raion Val d’Isarch. Purtruep iel nce tlo mo vel’ problem aministratif che n cëla de stlarì cun l aiut dla Provinzia per abiné soluzions adatedes.