La plaza da jughé a tennis fova plu da giut via n Sureghes, ma davia che n ova messù lascé la lerch ala nudadoia "Mardolomit" fovela unida spusteda ora a Runcadic.
La lia dl turism se ova cruzià de na luegia nueva y se metan a una cun Luis Hofer, che fova l patron di grunc ora l'Arnaria, fovel unit a s’l dé de pudëi frabiché a Runcadic cater plazes dal tennis alalergia. N valgun ani do, se ova Karl Mahlknecht, che fova l presidënt dla lia dl turism, cruzià de frabiché la bela strutura dal tennis, ulache n à ncuei nce la puscibltà de fé d’autra ativi- teies sportives. L’inaugurazion fova stata tl ann 1987 y perchël iel chëst ann avisa 35 ani che on chësta strutura. L ie n frabicat cun na particularità de marueia. L ie unì fat su n tët da giaurì ntan i mënsc plu ciauc y chësta inuvazion vën mo al didancuei prijeda dassënn. Te chësta strutura ne vëniel nia mé fat a tennis, ma l vën a s’l dé nce truepa d’autra ativiteies. Per chël che reverda l sport, oven la puscibltà de fé squash y canche chësc juech ne fova nia plu de moda, iel unì fat dainora na sala per l’arpizeda "boulder". Te n auter local iel n fitness center. Dedora iel n ciamp per beach volley y mo cater plazes per fé a tennis alalergia. Per chël che à da nfé cun l fonz da fé a tennis che ie dedite, iel n fonz dur tlamà "Green Set", che ie drët adatà per turnoies de tennis nternaziunei. L prim turnoi nternaziunel de tennis, che ie unì metù a jì tl ann 1999, fova n turnoi per l’ëiles y dal ann 2011 incà vëniel nce metù a jì n turnoi nternaziunel per i ëi, ulache l à fat pea danter l auter i doi campions de Südtirol Jannik Sinner y Andreas Seppi. Nia mé l sport, ma nce l artejanat artistich se noza de chësta strutura. Uni ann vëniel metù a jì l’Unika, che à for n gran suzes. Nia desmincë ne daussen i cunzerc de mujiga tlassica, che ie unic purtei dant plu suvënz dala grupa “Sonoton“ sota la ba- chëta de Matthäus Crepaz. Ora de chël iel stat la grupes de suzes “Die Ladiner“ y “Kastelruther Spatzen“ che à plu iedesc metù a jì manifestazions. Coche n vëija, pian via dala puscibltà de jughé a tennis, ons na strutura multifunzionela, che ne ie nia mé de utl ai sportifs, ma nce ai artejans y ala grupes de mujiga. La strutura ie al didancuei dla Park Urtijëi GmbH, na sozietà dl Chemun de Urtijëi, y vën fiteda al Tennis Club Urtijëi, che se cruzia dla urganisazion y dla manutenzion. La Park Urtijëi GmbH ie respunsabla per i nvestimënc che va de bujën per mantenì l fabricat, n fabricat che, coche on udù, lascia pro de mëter a jì na gran cumpëida de ativiteies y che cumplësc chëst ann 35 ani.