Urtijëi - Comunicat stampa Lista Unica
N merdi ai 19 de merz an dat ju la lista di candidac tl ufize de vela dl chemun de Urtijëi. La Lista Unica nueva ie carateriseda da na bela variazion danter esperienza y sgors jëunn y frësch.
I zitadins y la zitadines de Urtijëi à inò la puscibltà de pudëi crì ora sun la lista zivica danter na lista plëina cun 27 candidac y candidates n pue’ de de uni età. Scialdi bel iel che l ie daniëura n gran nteres da pert de candidates y candidac jëuni per fé pea ativamënter tl mpëni de manejé y mené inant l destin dl luech. La cumbinazion danter i plu ani de esperienza di sies cumëmbri dl cunsëi de chemun dla Lista Unica, che se mët inò a despusizion, y la ideies frësces di candidac y dla candidates nueves, garantësc na politica che se dà ju cun la cossa y la problematiches y che cëla danora. Sun la lista iel sëuraprò nce reprejentedes duta la grupes de nteres dl luech – dal studënt a chi che ie n pension, dal laurant al mprenditëur, dal hotelier y fitamajons al artejan.
“Ti ultimi ani an pudù realisé truep proiec, trueps d’autri ie bele nviei via o njeniei ca a na maniera che n posse tosc mëter man limpea. Nosc majer mpëni sarà chël de purté a bon fin chisc proiec y de pudëi nsci cuntribuì a n svilup sustenibl de nosc luech“, sotrissea l ambolt Tobia Moroder.
Pra i proiec plu mpurtanc che se on tëut dant, iel:
-
Renuvé y ngrandì la Cësa de Paussa sciche nce l Servisc Soziel, per chësc lëur iesen nce bele unic a una cun i chemuns de Ciastel, S. Cristina y Sëlva.
-
La streda de cunliamënt danter la streda Rezia y la Tresval tal “Fever“ y tl medemo tëmp smendramënt dl trafich tl tòch “Ladinia-Scudela“.
-
Plaza de S. Antone zënza auti y curieres, cun la stazion dla curieres che unirà spusteda, y nsci cun raion da jì a pe slungià.
-
La Cësa di Ladins, per chëla che n ie ruvei a una n cont dl finanziamënt cun i chemuns de Gherdëina, la Provinzia de Bulsan y la Union di Ladins de Gherdëina.
-
La realisazion de n raion modern per l sport ta Mulin da Coi n cunlaurazion cun l chemun de S. Cristina, per pudëi curì la gran dumanda da pert dla truepa lies dal sport de Gherdëina y per pité na nfrastrutura per l sport adateda nce per l daunì.
-
La realisazion dl raion de espanscion “Sobosch“ y “Pizer“ per l frabiché alesirà per la jënt da tlo. Da chësc instà inant saral mesun se lascé nuté su per la graduatoria.
-
L mpëni per la scoles per na mensa, palestra y albierch per i studënc.
N problem zentrel y che nes sta daniëura scialdi a cuer ie chël dl trafich, a chël che n puderà mé ti vester se metan adum y lauran deberieda cun i chemuns ujins y la Provinzia. “Ti ultimi cin’ ani an rujenà te na maniera drët costrutiva cun i autri chemuns dla valeda y cun la lies dl turism y n à laurà ora proiec per ti vester al problem dl trafich“, sotrissea l ambolt Tobia Moroder.
Dantaldut n cont de na streda de zircunvalazion per Urtijëi y de na plaza dai auti per turisć dl di a Puntives an ultimamënter fat vares drët costrutifs cun i assessëures provinziei Brunner y Alfreider, che vëija chisc proiec de bon uedl. La realisazion de chisc proiec sarà n var mpurtant per tò y tres l problem dl gran trafich y dl mpifamënt.
La Lista Unica ie per n svilup tl respet dl daunì per Urtijëi. Da auzé ora iel nce i traverc per l tlima, che la Provinzia ti à metù dant ai chemuns de Südtirol. Cun cumpetënza, mpëni y cialan danora ulons stlù ju i proiec scumencei y chëi che ie bele unic proietei, purtan pro a n svilup positif de nosc chemun.
I candidac y la candidates dla Lista Unica per la veles cumeneles che vën ie:
Tobia Moroder (candidat da ambolt), 43 ani – ambolt da śën
Valeria Bernardi, 24 ani – nsenianta dla scola elementera
Luca Chiodi, 31 ani – hotelier
Martina Comploi, 46 ani – diretëura dl Servisc Soziel
Lukas Demetz, 26 ani – eletrotecnich te n studio da njenier
Martin Demetz, 25 ani – designer y artist 3D
Romina Demetz, 45 ani – molera
Bernhard Flatscher, 48 ani – diretëur dl ITE Raetia a Urtijëi
Michele Fontanini, 28 ani – cunlauradëur tla firma de familia
Ervin Hyka, 41 ani – ost
Christine Insam, 50 ani – fitamajons
Monika Kelder, 62 ani – cunlauradëura dl Museum Gherdëina
Andreas Kondrak, 35 ani – artejan
Maria Kostner, 58 ani – diretëura dl Ciamp pedagogich
Rudi Kostner, 66 ani – setëur y curaverzons
Valentin Mahlknecht, 19 ani – studënt
Silke Meraner, 52 ani – nfermiera
Ludwig Moroder, 72 ani – biologh n pension
Moritz Peristi, 71 ani – n pension, fej mo l mëinacrëp y judacrëp
Rudi Pescosta, 72 ani – ost n pension
Janpiere Prugger, 29 ani – banchier
Luigi Romanelli, 39 ani – artejan
Konrad Senoner, 73 ani – n pension
Gabriel Senoner, 32 ani – prufesciunist liede
Michaela Sotriffer, 63 ani – maestra n pension
Heidi Stuffer, 57 ani – musicoterapista, nsenianta
Martina Vecchietti, 42 ani – contabla
