Venderdì 29 de auril á l chemun, sun pruposta de la Lia Natura y Usanzes, metù a jì de damesdi a rumé su cun 3 tlasses dla scola mesana. Una tlas ie jita te Val d'Anna, una dala promenade ora nchin a Runcadic y l'autra tlas dala buja de Nis su y da Col de Flam ju te val d'Anna . On abiná adum n grum de sac de maroca y i sculeies se à fat maruei tan de maroca che l ie ncantëur sce n cëla avisa. Ntlëuta che fona mo scola de sada, jiva i mutons mo pea la sada canche n jiva cun duc a rumé su. Ma davia che l ie bele n valgun ani nia plu sada scola, se àn mpensá de urganisé l venderdì mé per i sculeies, ajache l ie mpurtant che n i sensibilisea bele da pitli insù.
Venderdì sëira ie jic i destudafuech tl ruf de Cuecenes dal puent de Pana juvier ,l tòch ulache l ie dassënn rie ruvé permez. Nce tlo an abiná da bestia n grum de maroca. De gra al gran lëur che i destudafuech à fat!
N sada, ai 30 de auril, àn pona fat ora de jì l l danmesdì a rumé su. Duc chëi che ova nteres a tenì nët nosc bel luech y nosta bela cuntreda, fova i bënunii. La lies (p.e.la lia de chëi che va a pësc, la lia natura y usanzes, la lia da mont y i scizeri) à mandá si reprejentanc y n grum de zitadins à sentì l debujën de judé pea per tenì nët nosc bel luech. L ie nce ruvei pea i muciadives, che à dassënn judá. De ndut à judà pasa 50 persones, che coche rengraziamënt à pudù jì a marendé dal Terrazza. N à abinà n grum de maroca, dantaldut ti ruves, nce gran robes coche montli o toc de mascins y nsci inant. L ie for mo jënt che, zënza pensé do doi iedesc, smaca demez maroca, zënza pensé tan n gran dann che la pudëssa fé, lascian ora tuesse tla tiera o tl’ega...
N gra de cuer a duc chëi che à judà.
Sara Stuflesser (Cunseliera delegheda al ambient)
