L lëur dla Lista Unica ne se fërma nia. Achiet via, coche ie si stil, si maniera de lauré. Propi pra chësta ancuntedes danter ëi, iel na legrëza a udëi coche uni cunselier dla Lista Unica à na si ncëria y se cruzia cun l mascimo de si forzes de si cumpetënzes. “Zeche sà duc, dut ne sà deguni”, fova dan la veles l moto dla LU. Perchël à la grupa cialà do la veles de tré ite DUC chëi che à ueia de lauré y de se mëter a servisc dl zitadin. I proiec, pensëi do a puntin, se nuzan de cunzec struturei, (ajache uni cësa adrova na bona fundamënta) muev a var plan y trueps ie nce bele unic realisei. Nfat sce ambolt, assessëures, deleghei o cunseliers, duc à te chisc mënsc laurà drët bën te si ciamp, ne schivan deguna fadia.
Ma l mplu plajëi fej la maniera de lauré drët positiva danter dut l Cunsëi de Chemun. Chi che à ueia de lauré, chël arjonj nce zeche!
I resultac, i proiec y la prupostes di zitadins unirà metudes sun mëisa de nuvëmber, pra l’ancunteda ufiziela cun la persones.
La Lista Unica rengrazia ntant i zitadins per si sustëni y per si critiches costrutives. Na cultura de discuscion rëidla y argumentazions ogetives ie i prim cuncieres per na cunvivënza democratica y zevila.
