L’idea fova bel giut tl’aria. La discuscion ënghe, a dì l’urità:
Co dé na sburdla al artejanat artistich y dantaldut co mutivé nosc jëuni a fé inò i biei lëures, coche scultëur o moler, mestieres che manacia de murì ora?
Reprejentanc dl artejanat artistich, ferlëigheri, artisć, cumëmbri dl’UNIKA, reprejentanc dla scoles y nteressei se à n sada danmesdì ancuntà per rujené dla cuestion. Cie che ie unì ora dala trëi mëises de lëur unirà pona publicà plu inant. N curt possen dì che l’argumentazions jiva de viers dl lauré adum (teams de lauranc), dl cialé de viers dl daunì y se giaurì ala modernità (digitel), dla mpurtanza dla pratica (manualità ie mo la basa!), dl sustëni i jëuni cuncretamënter (“borse di studio” y autri finanziamënc), dl sustenì chiche ulëssa tò su n lerner, dl vester plu otimisć y dl cunlauré cun la scoles.
