Sun l link dessot pudëis ve desćiarië ju l protocol ufiziel
dl’ancunteda tla Cësa de Cultura per rujené dl daunì dl artejanat. Ntant se à
bele plu artejans muet y se anconta regularmënter sota la curdinazion de Peter
Kostner per desceidé dantaldut ti jëuni la ueia de mparé l mestier dl ziplé. Na
gran lauda ai ulenteres che se dà ju cun chësta vijion per sluminé inò n ert
che ti ultimi ani univa suvënz udù ala zibla. L Chemun à la cunsapuvelëza che l
sarà na streda ërta, ma nce che cun pitli vares al iede pudran arjonjer truep.
La va debujën de na cunlaurazion sistematica danter ferlëigheri – artejans –
scola – gentiores – istituzion publiches. Mé lauran se nuzan dla sinergies y
scutan su la minonghes che flurësc sun la basa dl’esperienza, possen lauré a na
moda che l artejanat sibe inò nteressant per i jëuni. Ajache l potenzial,
chësta la minonga di trueps unic adalerch, ie mo tlo! Ma la va de cialé inant y
nia de śaré la portes dan la innuvazions che l mond nes pieta di per di.